تغطية فريق هليوبوليس (ج) في بطولة الغردقة المفتوحة 2013

يخصص هذا القسم للمواضيع الخاصة بالمسابقات و المهراجانات و أخبارها

المشرف: مشرفين

صورة العضو الشخصية
wagihov
مشاركات: 2792
اشترك في: الجمعة يونيو 30, 2006 10:57 pm
مكان: القاهرة

تغطية فريق هليوبوليس (ج) في بطولة الغردقة المفتوحة 2013

مشاركةبواسطة wagihov » الثلاثاء مارس 05, 2013 10:38 pm

السلام عليكم ورحمة الله تعالى وبركاته

أخيرا و بعد 3 سنوات من تمثيل نادي هليوبوليس في المسابقات، أخيرا فزنا بذهبية الجر :mrgreen:

البطولة كانت بطولة الغردقة المفتوحة للصيد بطرق الجر و التسقيط و الجيجينج و البوبينج بمشاركة 15 فريق يمثلون 8 أندية و هيئات هم نادي صيد اسكندرية، نادي يخت اسكندرية، نادي صيد الدقي، نادي المعادي، نادي هليوبوليس، نادي مطاي المنيا، نادي المحلة، و نادي الرياضات البحرية.

فريقنا دخل البطولة بمزيج من روح التحفز و النفس المفتوحة. نفسنا مفتوحة لأن نفس الفريق حصل علي برونزية الجر في بطولة كأس الاتحاد التي أقيمت في ديسمبر 2012 و دي حاجة بقالها زمن ان يتم تتويج فريق من هليوبوليس بمركز في الجر. و تحفز لاستمرار النجاح و تحسين تصنيف النادي الذي تراجع الي الخامس بعد ان كان النادي من رواد رياضة صيد الأسماك. "كان" فعل ماضي، عايزين نخليه حاضر. :)

بنظرة علي المنافسين، نادي صيد اسكندرية نازل بفريقين، منهم فريق استاذنا الحاج طارق المغربي. و يخت اسكندرية نازل بفريقين من أثقل ما يكون، فريق بقيادة أيمن حسونة، و فريق استاذ الأساتذة عادل والي لكن بدون عادل والي ذات نفسه لكن باقي الفريق موجود مثل شاذلي و الحرقاني و باقي الفريق. و لمن لا يعرف عادل والي، هو كابتن منتخب مصر الفائز بذهبية العالم 2010 و برونزية العالم 2012، و فريقه في نادي اليخت يضم صيادين درجة أولي، و بينزل علي مركبه "والي" بقيادة الريس عباس اللي يعتبر واحد من عفاريت صيد الجر في الغردقة. من الآخر، الفريق ده يبقي برازيل مصر :mrgreen: باقي الفرق لا يستهان بها بالمرة، ففريق نادي المعادي به اسماء تستدعي الاحترام مثل اللواء عبد القادر البنان و الأستاذ هشام أبو حسين و باقي الفريق، ده غير انهم داخلين بنفس مفتوحة بعد ان اصباح رئيس الاتحاد من عندهم، اللي هو الاستاذ محمد القداح. ده غير فريقي نادي صيد الدقي و دخلتهم المنظمة بالزي الموحد الشيك، و كلهم شباب، و أكيد مستواهم سيختلف بعد ان انضم لهم استاذي الكبير سيف خيري و فريقه بالكامل من نادي الجزيرة. لكن للأسف فريق سيف خيري لم يشارك في البطولة. و طبعا لا يمكن اغفال منافسين مثل أندية مطاي و المحلة، فيكفي مطاي انها المشاركة الثالثة او الرابعة و اخذوا خبرة، اما المحلة فقد حقق برونزية التسقيط.. يعني الفرق كلها يتعمل لها ألف حساب!

أما هليوبوليس فكان نازل بخمسة فرق!! :shock: ايوة الرقم صحيح، خمسة في عين العدو :mrgreen: اتفقنا فيما بيننا ان 3 فرق هاتركز علي التسقيط، هم فريق الأستاذ هشام أمين و علي الحلبي، فريق الأستاذ علي عيسي، و فريق الأستاذ علاء دانش. أما فريق علي البدوي سيقوم بالتركيز علي الجيجينج. أما فريقنا بقيادة كابتن حلمي عزب فهو تقريبا الفريق الوحيد في هليوبوليس اللي بيركز علي الجر. باقي أعضاء فريقنا هم أ/خالد سليمان، أ/رماح طه، أ/وليد رماح طه، أ/هشام غانم، و محمد وجيه.

من يوم الوصول و احنا في حالة مناقشات عن استراتيجيات الصيد اللي هانتبعها. و اتفقنا علي حاجتين 1- لو لقينا بلاميطة هانشتغل عليها لأن ده موسمها و ممكن نخلص بيها المسابقة، خصوصا ان تم تعديل القانون ليكون الحد الأدني لوزن السمكة 1 كيلو بالنسبة للبلاميطة لكن يظل 3 كيلو لباقي الأنواع 2- عايزين ننزل جنوبا ناحية سفاجا طالما ان الجو ثاني و ثالث يوم حوال. و توكلنا علي الله و انطلقنا يوم الأربعاء علي الجنوب فعلا و مافيش بعد نصف ساعة و نسمع اول زنة و احنا لسة جوة البلد، و هشام يلمها و يجيب اول بلاميطة :D الحمد لله يا كابتن حلمي، كده احنا مش صفر انهاردة :D راح مبرقلي و قال لي احنا عايزين 20 كيلو كل يوم عشان نكسب :twisted: ، فاهمني ولا لأ؟؟ قولتله حاضر هاتفق مع الراجل اللي تحت :lol: المهم لقينا مركب جاية من الجنوب و راجعة علي المارينا، و احنا عارفين انها بتاعت الأستاذ علي عيسي زميلنا، فعلي طول عملنا اتصالاتنا و عرفنا انهم راجعين فاضيين و مافيش سمك في الجنوب :shock: و كان القرار الفوري بالإجماع "لف و ارجع تاني"!!! طلعنا شمال و وصلنا شبرور ام جمعر و جرينا حواليه، مافيش حاجة.. كملنا علي العرق الكبير و منه الي طوال، علي ما وصلنا طوال كانت الساعة 2:30. خالد سليمان طول عمره بيحب ينزل طيارة و كل شوية يغير الجيلي بيلي اللي عليها. المهم وصلنا طوال و راح مطلع ريشتين 10 سم برأس معدن أصغر من بعض، و وراهم لكابتن حلمي و قاله ايه رأيك، فرد عليه و قال له الخضراء حلوة. نزلها و مافيش 5 دقايق و ززززززززززززززززززززززززززززززززز و السمكة تروح! :shock: طلعها و شيك عليها و علي الجلب و نزله تاني و كمان زززززززززززززززززز و تشرف بلاميطة تانية :D بسسسسسس كده عرفنا الشغل ازاي و قلبنا التشكيل كله طيارات و ريش و xrap-20 و 15 و نلف حول نفس المكان، و انهينا اليوم بحصيلة 9 بلاميطة كان لخالد سليمان نصفهم تقريبا، بمجموع 22 كيلو ... مرضي يا قبطان؟ :mrgreen: قاللي مرضي :lol:
حوالنا عبثا عمل اتصالات عشان نعرف باقي الفرق عملت ايه لكن ماعرفناش غير ان هشام أمين هليوبوليس أخذوا بلاميطة واحدة و التسقيط نص نص. المهم وقفنا نسقط و اخدنا كوشر و شريفة و كام حبرية و دخلنا نمنا عشان عندنا يوم مبكر غدا

صحينا تاني يوم قبل الشروق و بصراحة اتدلعنا شوية و ابتدينا التحرك بعد الشروق بحوالي ربع ساعة (ربع ساعة في مسابقة يحصل فيها كتير) و اتجهنا علي الجوبال.. و كابتن حلمي يقول لي بالمنظر ده عايزين انهاردة 30 كيلو مش 20، و انا اقوله حاضر :mrgreen: المهم استفتحنا اليوم بواحدة بلاميطة لخالد سليمان اللي مغيرش ريشته لآخر المسابقة، و في طريقنا لرأس الجوبال مكنة وليد تزن جامد و تروح، و للأسف دي مكانتش بلاميطة دي كانت سمكة محترمة :( يلا خير. في الراجع من الرأس شدينا كمان واحدة بلاميطة لخالد و كملنا علي انغش وناخد كمان بلاميطة! و ننزل علي ابو نحاس و هوبا البورد قلب أهه :D لم بوردك يا كابتن حلمي :D :D ايه ده :roll: ايه يا برنس ده يا برنس؟؟؟ :twisted: شريفة كيلو و نصف :mrgreen: المهم كملنا علي ظهر شدوان لحد ما وصلنا عند منطقة العساكر و الفنار و ناخد كمان واحد بلاميطة لخالد. و نلف علي بطن شدوان و الساعة كدة وصلت 1:00 و كابتن حلمي يقول لأ يلا نرجع علي منطقة امبارح عشان نلحق ناخد سمكتين، و كملنا فعلا في طريقنا. و احنا في الطريق جالنا مكالمة من اللواء فؤاد سكر عضو لجنة التحكيم ان ترتيبنا أمس كان الأول :D :D كلنا نفسنا اتفتحت و انتفشت و بقينا آخر طعطعة :mrgreen: المهم وصلنا لسيول الصغيرة علي الساعة 3:00 بحالة تفاؤل رهيبة و تبدأ حفلة البلاميطة مرة أخري :mrgreen: و تكون حصيلة اليوم 14 بلاميطة أكثر من ثلاث أرباعهم لخالد بمجموع 33 كيلو + بلاميطاية تحت السن :mrgreen: مرضي يا قبطان :lol: مرضي، بس احنا بكرة نطلب بقي 40 عشان يجيلنا 44 :lol: :lol:
المهم ليلا جبنا 5 مرجانات بالعدد و 2 كاليماري واحدة فيهم 2 كيلو. هنا ادركنا اننا خرجنا من منافسات التسقيط فقررنا اننا ناكل التسقيط ثالث يوم :lol: المهم دككنا البلاميطة اللي تحت الوزن و الكاليماري الصغير و نمنا

صحينا ثالث يوم مبكرين لنأخذ جرة بالحي عند أم جدور، لكن لم تسفر عن شئ، فقرر كابتن حلمي ان نرجع نشتغل علي البلاميطة.. و قد كان، أخذنا واحدة في الثانية في الثالثة في الرابعة و كملناهم بالخامسة و علي 12 الظهر عرفنا ان ترتيبنا بالأمس كان رابع :shock: :shock: :!: ازاي و مش ازاي ده احنا جايبيين اكتر من اول يوم اللي طلعنا فيه اول :| :| و خيم الاحباط علي المركب و الوجوم علي وجوهنا. شوية و لقينا الريس بيقول لكابتن حلمي نبدأ رحلة الرجوع علي الغردقة الساعة 2؟ طبعا كابتن حلمي رد بحدة لأ احنا عايزين نكسب! بعد مفاوضات اتفقنا ان نفضل في نجر في سيول الي 4:30 علي اساس اننا نرجع علي المارينا علي طول نبيت فيها، خصوصا ان فيه انباء بقيام عاصفة ليلا. ظبطنا الساعة علي 2:30 و بدأت الحفلة و البلاميطة تضرب 3 و 2 مع بعض، و بلاميطة تانية تضرب عليا و انا بالم الربالا و هي فاضية و أخري تضرب علي كابتن خالد و هو بينزلها ... بس لسة مش قادرين نفرد وشنا :( ده 33 كيلو جابولنا رابع يبقي احنا محتاجين أد ايه انهاردة؟ :( الساعة جت 4:40 و الريس بدأ يتجه علي الغردقة و معنا 19 سمكة، و هنا وقفت علي الطبلية و قلت يجب ان نفخر بما حققناه ايا كانت النتيجة، لقد قمنا بعمل رائع في كل الأيام و يجب الا نحزن. و الحمد لله ان هذه الكلمات كانت سببا في ان الجو يفك و بداية عودة البسمة لنا. المهم و احنا في الطريق ضرب علينا كمان 4 بلاميطة، و كدة قفلناهم 23 بإجمالي وزن 55 كيلوا :D :D اضحك بقي يا قبطان، فرصة الأول انهاردة كبيرة :wink:

و دخلنا المارينا و لقينا فريق المعادي في ظهرنا طالع علي المارينا هما كمان، و وراهم فريق هشام أمين. عرفنا ان المعادي جايبين سمك جيجينج، و هشام امين قال لنا ان تسقيطهم كله علي بعضه مجابش 60 كيلو ... بعد الاتصالات العديدة في شائعات اننا ثالث يوم واخدين ترتيب اول، بس ربنا يستر في موضوع ترتيب الرابع في ثاني يوم دي. المهم نمنا و صحينا و قبل مراسم الوزن، نسمع شائعات كثيرة، منها ان اللواء عادل خيري نائب رئيس الاتحاد يقول لكابتن حلمي "عملتها أخيرا يا حلمي :wink: " .. و منها ان الحاج طارق يقول لي ان اخذ 5 نقاط فقط بينما ان احنا اخذنا 6 يبقي هو الأول... و منها ان يخت اسكندرية عمل شغل جامد و جابوا نواجل ... و الأعصاب بقت مربي، ولا كأننا منتظرين نتيجة الثانوية العامة :cry: نستني الميزان.

و مع مراسم الميزان تظهر بقي نواجل نادي اليخت، و براكودات نادي صيد اسكندرية، و و و و و و تنتهي مراسم الوزن و نعرف ان احنا و صيد اسكندرية واخدين 6 نقاط و احنا اللي في المقدمة اول و ثاني تفوق عام. لكن الحسم هايكون بإجمالي الوزن. احنا للأسف لم نسجل نتايجنا لنعرف النتيجة بدري، لكن الحاج طارق عرفها، و بروحه الرياضية و أخلاقه الجميلة المعروفة اول ما شافني بعد الوزن قبل الحفلة، استقبلني بابتسامة عريضة و هو بيقولي الف مبروك يا جيهة :D :D بصراحة، رغم فرحتي بالمركز الأول، الا اني حسيت بنوع من الانكسار لخسارة الحاج طارق بفارق ضئيل (7 كيلو) و حسيت ازاي ان المركز الثاني يزعل رغم ان المركز الثالث يفرح... هارد لك حاج طارق و ان شاء الله تتعوض، بس في مسابقة ماكنش انا مشترك فيها :twisted:

و تتعلق النتيجة و نعرف رسميا اننا الأول ثم صيد اسكندرية ثم صيد الدقي، و ياللهول يخت اسكندرية (برازيل مصر) ماحققش مركز، و دي كانت مفاجأة بالنسبة لي :shock: و جايزة احسن صائد جر يفوز بها الحاج طارق و هو يستحقها حتي لو لم يصطد :) و ثاني احسن صائد لخالد سليمان بعد ما لم حوالي 26 سمكة من ال46 :) و كأس الجيجينج يروح للمعادي بثلاث سمكات فقط، و من حظهم انهم اصطادوا سمكة في كل يوم :) و بالطبع أحسن صياد جيجينج كان من عندهم. و كأس التسقيط لهليوبوليس (هـ) بقيادة علي عيسي و كان الفريق الوحيد اللي نصفه سيدات، لكن سيدات صيادات درجة أولي و ليست اول مرة لهم علي منصات التتويج مثل الأستاذة غادة عاطف، و منهم من كانت عضو بمجلس ادارة الاتحاد مثل الاستاذة جيهان عبد الحليم، و بكده هليوبوليس يحقق ثنائية جميلة، و عقبال الثلاثية. جاء بعدهم صيد الدقي في المركز الثاني ثم نادي المحلة في المركز الثالث

و انتهت المسابقة :) بفوارق ضئيلة بين الفرق و منافسة شرسة :) و أخذنا اول ميدالية من الاتحاد بعد 3 سنوات من التمثيل، هانمشيها انه تمثيل مشرف :twisted: و طلعنا من المسابقة بالعديد من الدروس التي تعلمتها عملي، و الحمد لله :) و نراكم الموسم القادم ان شاء الله

كابتن خالد اللي شرفنا
صورة

صورة

مع احدي بلاميطاته
صورة

مع "بعض" البلاميطة بعد الوزن
صورة

الفريق من اليمين: محمد وجيه، رماح طه، الكابتن حلمي عزب، خالد سليمان، هشام غانم، وليد رماح طه
صورة

باقي الصور كلها من الموبايل و رديئة الجودة للأسف و ليست كثيرة لأن الكاميرا لسة ماتصلحتش
ليس لديك الصلاحية لمشاهدة المرفقات
صورة
استرجل و استعمل champix للعلاج النهائي من التدخين
مع تحياتي،
محمد وجيه، الرحالة

صورة العضو الشخصية
Khaled M. Soliman Aly
مشاركات: 19
اشترك في: الأربعاء مارس 26, 2008 4:10 am

Re: تغطية فريق هليوبوليس (ج) في بطولة الغردقة المفتوحة 2013

مشاركةبواسطة Khaled M. Soliman Aly » الثلاثاء مارس 05, 2013 11:32 pm

بسم الله الرحمن الرحيم

السلام عليكم ورحمة الله وبركاته

إزيك يا محمد وشكرا على السرد الجميل للبطولة وإن شاء الله مزيد من التفوق لنادينا الجميل

وعلى فكرة أنا حصلت على ثانى أحسن صائد جر فى البطولة ومجموع ما حصلنا عليه 46 سمكة بلاميطة والحمد لله ربنا وفقنى أن أصتاد 27 واحدة منهم وده طبعا بتوفيق الله سبحانه وتعالى وتعاون الفريق كله وروح الحب والألفة بيننا وطبعا حسن تعاون الريس سالم والشيخ محمد وباقى طاقم المركب.
وإن شاء الله المرة القادمة تشترك معنا فى بطولة العالم لأن لها طعم تانى وخبرة من نوع أخر وخصوصا بطولات العالم التى تقام فى دول على المحيط مثلما إشتركتنا فى بطولة العالم فى جنوب أفريقيا وبطولة العالم فى المكسيك وأخرها بطولة العالم فى أسبانيا ولكن كانت فى البحر الأبيض المتوسط.
والبطولات التى إستفدنا منها إيضا البطولة العربية فى العقبة بالأردن والبطولة العربية بينبع بالمملكة العربية السعودية
إن شاء الله مزيد من البطولات لكل أحبائنا من الأندية ودوام التوفيق

خالد محمد سليمان على

صورة العضو الشخصية
محمد.عمر
مشاركات: 126
اشترك في: الأربعاء سبتمبر 12, 2012 12:09 am
مكان: القاهرة

Re: تغطية فريق هليوبوليس (ج) في بطولة الغردقة المفتوحة 2013

مشاركةبواسطة محمد.عمر » الأربعاء مارس 06, 2013 1:47 am

الف مبروك و ياريت دايما كدا تكونوا ف المقدمة

صورة العضو الشخصية
madohamada
مشاركات: 262
اشترك في: الجمعة أكتوبر 26, 2012 8:24 pm
مكان: بورسعيد

Re: تغطية فريق هليوبوليس (ج) في بطولة الغردقة المفتوحة 2013

مشاركةبواسطة madohamada » الأربعاء مارس 06, 2013 6:23 am

الف مبرووك ياريس وجيه دايما في تقدم
محمود حماده-بورسعيد
01287015850
شرفونا في جروبنا جروب متخصص للصيد في بورسعيد
https://www.facebook.com/groups/fishing.in.portsaid/

elsrawy
مشاركات: 58
اشترك في: الثلاثاء مارس 04, 2008 6:32 pm
مكان: القاهره - مدينة نصر
اتصال:

Re: تغطية فريق هليوبوليس (ج) في بطولة الغردقة المفتوحة 2013

مشاركةبواسطة elsrawy » الأربعاء مارس 06, 2013 7:36 am

موضوع رائع لصياد أكثر من رائع يا وجيه باشا
وأنشاء الله نتقابل البطولة اللى جايه على خير
(رب أشرح لى صدرى ويسر لى أمرى)

صورة

seif khairy
مشاركات: 5280
اشترك في: الثلاثاء مايو 02, 2006 3:17 pm
مكان: القاهرة-6 اكتوبر

Re: تغطية فريق هليوبوليس (ج) في بطولة الغردقة المفتوحة 2013

مشاركةبواسطة seif khairy » الأربعاء مارس 06, 2013 8:36 am

الف الف مبروك يا جيها
الف مبروك على الكاس لك و لكل اعضاء الفريق
الف مبروك لخالد سليمان ذو الاخلاق الدمثة
الف مبروك لفرق نادى هليوبوليس على التمثيل الرائع
الف مبروك لكابتن مصر طارق المغربى اخويا و حبيبى و صديقى العزيز
ان شاء الله دائما فى مراكز متقدمة
مع تحياتى
سيف خيرى
عاشق الصيد


صورة


صورة العضو الشخصية
sinkort
مشاركات: 371
اشترك في: الجمعة يوليو 23, 2010 1:56 am
مكان: القاهرة - المعادى

Re: تغطية فريق هليوبوليس (ج) في بطولة الغردقة المفتوحة 2013

مشاركةبواسطة sinkort » الخميس مارس 07, 2013 10:29 am

يا جيها يا مولعهااااااااااا :)

الف مبروك و من نجاح الى نجاح ان شاء الله :)
______________________________________________
مع تحيــاتى

هــانى عبــد الـنعيــم

______________________________________________
بسم الله الرحمن الرحيم

يَا أَيُّهَا الَّذِينَ آمَنُواْ اصْبِرُواْ وَصَابِرُواْ وَرَابِطُواْ وَاتَّقُواْ اللَّهَ لَعَلَّكُمْ تُفْلِحُونَ"

صدق الله العظيم
[/b]

صورة العضو الشخصية
ashrology
مشاركات: 54
اشترك في: الاثنين أغسطس 29, 2011 6:35 am
مكان: بورسعيد

Re: تغطية فريق هليوبوليس (ج) في بطولة الغردقة المفتوحة 2013

مشاركةبواسطة ashrology » الخميس مارس 07, 2013 3:54 pm

الف مبروك يا عم وجيه ويارب من نجاح لنجاح دايما
ومن تكن العلياء همة نفسه ----- فكل الذي يلقاه فيها محبب

كيميائي / أحمد عشري

صورة العضو الشخصية
ahmed elkersh
مشاركات: 600
اشترك في: الاثنين سبتمبر 05, 2011 6:50 am
مكان: القاهره_ مدينة نصر

Re: تغطية فريق هليوبوليس (ج) في بطولة الغردقة المفتوحة 2013

مشاركةبواسطة ahmed elkersh » الجمعة مارس 08, 2013 12:23 am

سرد ممتاز جداااااا جداااااااا ورائع فعلا يا جيهه بك
والف مليوووووووووووون مبروك ,, لك وللجميع
صورة

Uploaded with ImageShack.us
انا كالبحر...احتمل ,, اصبر ,, واتقبل الكثير....[/size][/color][/i][/b]

احمد الحريرى
مشاركات: 198
اشترك في: الخميس مايو 01, 2008 5:38 pm

Re: تغطية فريق هليوبوليس (ج) في بطولة الغردقة المفتوحة 2013

مشاركةبواسطة احمد الحريرى » الجمعة مارس 08, 2013 2:35 pm

ألف مليون مبروك يا جيها يا جامد
وعقبال بطولة العالم بجد مش مجاملة والله تستاهلها

صورة العضو الشخصية
ahmed kapten
مشاركات: 1558
اشترك في: الأربعاء أغسطس 27, 2008 7:19 pm

Re: تغطية فريق هليوبوليس (ج) في بطولة الغردقة المفتوحة 2013

مشاركةبواسطة ahmed kapten » الجمعة مارس 08, 2013 4:43 pm

طول عمرك جرير من طراز خاص ههههه
الف مبروك يا جيهة
[صورة


العودة إلى “أخبار المسابقات و المهرجانات”

الموجودون الآن

المستخدمون الذين يتصفحون المنتدى الآن: لا يوجد أعضاء مسجلين متصلين وزائر واحد