أحداث بطولة العالم للجر 2012 باسبانيا و فوز مصر

يخصص هذا القسم للمواضيع الخاصة بالمسابقات و المهراجانات و أخبارها

المشرف: مشرفين

seif khairy
مشاركات: 5280
اشترك في: الثلاثاء مايو 02, 2006 3:17 pm
مكان: القاهرة-6 اكتوبر

أحداث بطولة العالم للجر 2012 باسبانيا و فوز مصر

مشاركةبواسطة seif khairy » الأحد سبتمبر 30, 2012 12:01 pm

السلام عليكم يا احلى صيادين


اولا الحمد لله على ما وفقنا اليه الله من مركز متقدم فى بطولة العالم لصيد الجر و المقامة بنظام الكاتش اند ريليس اى الصيد ثم الاعادة الى الماء و التى اقيمت باسبانيا خلال سبتمبر 2012


بعض المعلومات عن البطولة
عدد الفرق 15 فريق
عدد الدول 7 دول و هو الحد الادنى لاقامة اى بطولة عالم
الصيد بطريقة الجر فقط و اتباع نظام الكاتش اند ريليس
ممنوع استخدام الوجله و يتم رفع السمك الى المركب اما بالملقاف او على الشعر بالنسبة للسمك الصغير
الخيوط المستخدمة 30 ليبرة اى حوالى سمك 57 او 55 مم
السنون كلها بدون راجع
الرابالات كلها يتم استبدال السنون المتلت بسن واحد فقط فى نهاية الرابالا و يكون بدون راجع لسهولة تخليص السمك و ارجاعه للماء
الخروج صباحا و العودة مساءا للمبيت بالفندق
اللنشات يتم عمل قرعة عليها و بالتالى كل يوم لنش جديد بريس جديد
الفريق يتكون من 4 لاعبين و 5 بوصات
هناك جدول نقاط للاسماك المصادة و للتوضيح مثلا فالمارلين ب500 نقطة و التونة الزرقاء ب400 نقطة و الحصان ب350 و هكذا و يشترط ان يتعدى طول السمكة 50 سم حتى يتم احتساب النقاط كاملة كما هو محدد بالجدول و كل ما هو دون الطول المحدد يحتسب ب5 نقاط فقط


مصر اشتركت بفريقين مصر ( أ ) و مصر ( ب ) و هو ليس مسمى له اى علاقة بقدرات اى من الفريقين انما للاستدلال فقط و قد شرفت بأن اكون من ضمن فريق مصر (أ)

السفر كان من مصر يوم 15 سبتمبر على الخطوط الالمانية و المشكلة كانت فى الترانزيت الى مايوركا و الذى تجاوز الساعات الثمانى بقليل

و كانت احلى المفاجأت هى مقابلة اخى و حبيبى عبد الرحمن بك العفيفى بمطار القاهرة و الذى اتى خصيصا من صالة 1 الى صالة 3 لتحيتنا و تسهيل مهمة سفرنا و هو نموذج رائع للاخ و ظابط الشرطة كا نبتغى ان نراه و كان وشه علينا وش السعد

توكلنا على الله و وصلنا الى مطار فرانكفورت و الساعات تمضى ببطء ما بين شاى و قهوة و قهوة و شاى و ساقع و ميه و ميه و ساقع و حديث لا ينتهى عن الصيد و السمك و البطولة

ثم كانت طائرة اسبانيا و التى هبطت الى جزيرة مايوركا و هى مكان اكثر من رائع و تم الانتقال الى الفندق باتوبيس من المطار بعد تحميل الشنط و العتاد

اليوم الثانى للوصول كان من المفترض ان يكون يوم الافتتاح الرسمى للبطولة بعد وصول الفرق و كان فى المساء

استأجرنا سيارة مينى باص للفريق للتنقل بها خاصة و ان مرسى الخروج يبعد عن الفندق حوالى 10 دقايق بالسيارة و كان اول مشوار هو الذهاب الى المارينا لسببين اولا الاطمئنان على المراكب و رؤيتها و معاينتها و طبعا الاهم هو زيارة لمحل صيد بالمارينا برغم اننا معنا تقريبا كل انواع العدة

المحل طبعا غالى موووووت مقارنة باسعارنا فى مصر يعنى الحمد لله نحن فى نعمة و ساعطى مثال الرابالا الاكس راب بحوالى 20 يورو اى ما يعادل 160 جنيه مصرى !!!!!!!!!!

تم شراء سنون لتغيير هوكات الرابالات لأننا فوجئنا هناك بموضوع الكاتش اند ريليس و هو كان صدمة فى الواقع لنا لاننا لسنا مجهزين لهذه النوعية من الصيد و كذلك عدتنا ليست متوافقة مع هذه النوعية و بالتالى تغيير السنون فرض مع تطريم السن او كسر الراجع و كان بالفعل
فى المساء ذهبنا مرة اخرى الى المارينا لحضور حفل الافتتاح و هنا اقول عمار يا مصر !!!! اتذكر هنا حفل افتتاح بطولة 2010 و 2007 و كيف كان حفل الافتتاح رائع و محترم و مبهر برغم بساطته و هو عكس ما رأيناه فى اسبانيا

الحفل عبارة عن تجمع على رصيف الميناء و خشبة مسرح و تبادل كلمتين بين نائب رئيس الاتحاد الدولى و مندوب عن رئيس الاتحاد الاسبانى ثم يصعد فريق كل دولة مع عزف السلام الوطنى و انتهى الحفل على ذلك . لا مشروبات و لا عشاء و لا حتى شوية يتى فور او قطعة شيكولاتة و اللى عاوز حاجة ساقعة يشترى كوباية بلاستيك بشوية كوكاكولا ب2 يورو !!!!!!!

ما علينا مش مهم

اليوم التالت هو يوم التمرين و كنا نود ان نذهب لكن الميزانية لا تسمح لا الاتحاد و لا نحن كاشخاص و للعلم ايجار المركب يوم التمرين ب1500 يورو اى 12000 جنيه مصرى !!!!!! و بالتالى يلغى التمرين و هو مهم جدا للتعرف على المياه التى سيتم الصيد فيها و انواع الطعوم و سرعة المشى

المهم نأتى لأحداث اول يوم و كان الاستيقاظ 5 صباحا ثم الافطار من 6 و التواجد بالميناء الساعة 6.30 و التحرك 7 صباحا

وصلنا و تعرفنا بقائد اللنش و هو لنش فاخر طوله حوالى 10 متر مزود بمكنتين ديزل قدرة الواحده 250 حصان !!! و طبعا مزود باوت ريجر و مختلف انوع الاجهزة الملاحية التى تخطر على البال وصولا الى ااوتوماتيك بايلوت الذى يقوم بقيادة المركب اتوماتيكيا مثله مثل الطائرة , بصراحة شىء رائع و مفهوم مختلف عما نعرفه او نفهمه , و على فكرة غالبية اللنشات بهذا الشكل باستثناء لنشين او تلاته

الاتفاق كان مع اللجنه المنظمة على ان اللنشات تخرج من الميناء و تفتح سرعة لمدة ساعة فى اتجه يحلو لها شمالا او جنوبا غربا او شرقا المهم اول خيط مش قبل الساعة 8.30

و انطلق اللنش طبعا سرعة رهيبة و ثبات رائع و قدرة و تحكم من الريس سواء البشرى او الاوتوماتيكى هههههههه

فى هذه الاثناء تم تجهيز شكال الطعوم التى سيتم لنزول بها و برغم انى كان معايا فى حدود ال70 رابالا مختلفة و منتقاة بعناية مما اقتنى لتتناسب مع طبيعة المكان كما قرات قبل المسابقة الا اننى اخترت النزول بريشة لا تتعدى ال6 سم للصيد بها و بدون رصاصة و تم تركيبها بالفعل و للعلم لم افكها الا اخر يوم من المسابقة مع غسيل العدة قبل العودة لمصر

نزلت الخيوط للماء و كان اتجاهنا شمال جزيرة مايوركا و بعد ربع ساعة زننننن خفيفة و كان دورى فى اللم و تشرف تونه حوالى 35 سم !!!! و ناخد 5 بونط لأن السمكة اقل من ال50 سم

شوية و زنننننن تانية خفيفة على نفس الريشة و بوصتى و تيجى تونة تانية اختها

شوية و زننننن حصان صغير لا يتعدى 40 سم لكن يخلع فى الميه لأن السن بدون راجع و الحصان سمكة عصبية فى الميه فطبعا مطلوب لها تكنيك مختلف فى اللم و تطليعها الى المركب

شوية زنننن تانية حصان اكبر نسبيا على نفس الريشة و البوصة و حصان اكبر نسبيا ممكن يدخل الوزن و ناخد 350 بنط لكن كنا نعتقد انه لازم السمك يطلع بالملقاف و بالتالى ملقاف المركب كبير جدا و المناورة به فى الميه صعبة جدا تضيع السمكة !!!!!! بصراحة شىء يعكنن

هنا تضاريت الاقوال و الفكار فكانت هناك وجهتى نظر اما بالقاء و الشغل على الحصنة لأنه بالتاكيد الكبير سيأتى مع الصغير و انا كنت مؤيد لهذا و وجهة النظر الاخرى الذهاب الى التونة و قد كان
وصلنا ارض التونة و بعض 10 دقايق رأيت وحش يطير فى الهواء و يقرص على سمك صغير ثم مرة اخرى سمك بيتقرص عليه و سمك بيطير فى الميه برضه بصراحة حمدت الله ان السمك موجود و استبشرت خيرا

و لكن التونة تأبى ان تدخل على اى من التشكيل الموجود فى الماء
رابالات و جيلى بيلى و ريش و داونريجر بمعلقة ولكن و لا الهواء
و الذى يثير الجنون اننا نرى السمك رؤى العين و نراه على الاجهزة الا انه لا يقترب من طعومنا و الذى يثيرنا اكثر ان هناك مراكب اخرى بجانبنا تلكع سمك و بوص مقوس و انت مافيش حاجة , طيب اكيد فيه حاجة غلط عندنا
نغيير تانى و تالت مفيش فايدة
شوية و المعلقة تتضرب و تتقطع لأن مشبك الداون ريجر مقفول زيادة شوية و يزيد الاحباط اكثر و اكثر
قررنا تغيير المكان و الرجوع للحصان لكن ريس المركب قالنا انا برضه هارجع بنفس سرعة الجر و بدون جرى لأن الاتفاق مع اللجنة المنظمة هو كده
و ينتهى اليوم الاول و معنا عشر نقاط فقط !!!!
و ساعة اخرى جرى بالمركب الى ان وصلنا المارينا ثم نبداء بسماع ارقام عجيبة , فريق مش عارف ايه جايب 115 سمكة و فريق ايه جايب 15 تونة (( ده طبعا اللى كان جنبنا))
العبرة بالنتيجة المعلنة و كلها ساعتين و تعلن النتيجة يا جماعة نستنى شوية
بعد العشاء تم تعليق النتيجة و بصراحة نصاب بالصاعقة الكبرى ففريق ايطاليا (أ) يصيد 113 سمكة حصان منهم 50 اقل من المقاس و 47من المقاس السليم و شوية سمك فكة من ابو 5 بنط و حصل على 16000 بنط نعم ستة عشر الف بنط !!!
يليه فريق المانيا ب7000 بنط و لكن الغيت نتيجته كونه يصطاد فى منطقة ممنوع الصيد فيها و كذلك فريق المكسيك
ثم فريق فرنسا ب6000 و كسور ثم المكسيك ب5000 و كسور و هم من كانوا بجانبنا ب10 تونات ده غير اللى اتقطع منهم
احنا نزل علينا لوح تلج بصراحة لأننا ترتيبنا فى المركز ال12 !!! شىء محبط و مثير و طبيعى لأن اليوم الاول ده كان بمثابة التمرين
بتحليل النتائج وجدنا ان الريش و الشغل على الحصان هو المضمون نسبيا
فالسمكة مالية الميه بدليل الكم المصاد من الفرق الاخرى , الريش و الطعوم الخفيفة هى الغالبة و بالتالى يتم تغيير الاستراتيجية تماما و يضاف الى ذلك انه اذا هجم علينا الحصان لا نتركه و لا نترك المنطقة الى اى مكان اخر الا بعد التأكد من عدم وجوده.
فوجئنا فى المساء بقرار من اللجنة المنظمة بأن اليوم الثانى سيتم تأجيله لسوء الاحوال الجوية و هو كان بمثابة هدية لنا و فرصة لالتقاط الانفاس و شراء الريش و عدة جديدة تتناسب مع الوضع و الظروف الجديدة و هو ما تم فعلا.

اليوم الثانى احداثه افضل من اليوم الاول فخروجنا كان مع ريس افضل من ريس اليوم الاول و الراجل كان على اتم استعداد للمساعدة حتى انه عرض علينا بعض العدد من عنده و اعتذرنا عن قبولها لأن معانا زيها بالظبط

المهم سافرنا حوالى 50 كيلو فى البحر و هدى السرعة لتنزيل الخيوط و بالفعل نزلنا ب4 ريشة مختلفين و رابالا واحدة و يدوبك 10 دقايق و اول زنة و حصان يدخل المقياس . يكمل لف مكان ما اتضرب الحصان الاول و فجاءة نلاقيه بيبطل المركب و يقف فى مكانه و ينده علينا بتقصير الخيوط لأن الحصنة امام المركب.
بالفعل عملنا زى ما قال و دخلنا و هوب اتنين فى تلاتة فى اتنين و فى اقل من نص ساعة كنا واخدين 11 حصان فى الميزان غير 3 او 4 اقل لكن الحمد لله
بقية اليوم لم يسفر عن شىء نهائياز

نعود للمارينا و نسمع ارقام برضه خرافية اللى جليب 100 و كسور سمكة و اللى جايب 80 و اللى و اللى , بصراحة نفس الكلمة اللى قلتها , قلتها تانى العبرة بالنتيجة لما تتعلق .

بالفعل النتيجة اتعلقت و كان ترتيبنا فى اليوم ده الرابع!!!! و قفزنا بالترتيب العام الثانى عشر الى السابع . بالنسبة لنا ده كان انجاز عظيم جدا

اليوم الثالث كان ميعادنا مع المركب اللى حقق المركز الاول فى اول يوم مع الايطاليين . كنا متفائلين و مبسوطين انه ربنا ان شاء الله هايكرمنا و ممكن نعمل حاجة مع الريس ده.

المهم دخلة الريس علينا ماكانتش و لابد ليه ؟ اول حاجة قالها : عاوزين تطلعوا فين؟؟؟؟ نعم نطلع فين امال انت جاى تعمل ايه هنا يا عم الريس الاسبانى انت؟ و فين نتائج و مكان اول يوم . قالنا انا ماعرفش حاجة اصل انا مش من هنا . طيب قلنا نطلع جنوب لأن الايطاليين و المكسيكيين بيشتغلوا جنوب. خرجنا من الميناء و بنتجه جنوب و لاقينا الهوا عالى قالنا كده هانتعب تحبوا تعملوا ايه ؟ طبعا ده مأزق و محتاج سرعة قرار خاصة و انه اليوم الاخير و يزيد عليه انه يوم قصير لأن الخيوط هاتخرج من الميه الساعة 3.30 مش 5.30 زى كل يوم
اتفقنا نطلع على نفس مكان اليوم التانى و بالفعل طلعت له الجهاز بتاعى و توكلنا على الله .
هوب اول زنة بعد ماوصلنا ثم هدوء غريب لمدة ساعتين او اكتر. فى اثناء الشغل لاقينا الريس بتاع تانى يوم جاى علينا و بيشاور انه ما اخدش حاجة لحد دلوقت. المهم قررنا بعد ساعتين لف و دوران اننا نتحرك فى اتجاه البر يمكن نلطش حاجة فى السكة .
و احنا ماشيين و حوالى الساعة 2.30 نلاقى عرق خشب حوالى متر و نص طول عايم على وش الميه و الريس داخل عليه و بيلف و هوب زنتين على المكن يطلعوا بحصانين حلوين فى الميزان. لفة تانية و ناخد التالت بتاعهم .
بصراحة كان بداء اليأس يدب فى نفوسنا من اننا ممكن نلاقى سمك لكن ربنا كريم و ساعة الرزق لا يعلمها الا هو

الساعة 3.30 نلم الخيوط و نرجع المارينا. طريق العودة كان اصعب مرة نرى فيها البحر . اولا الهواء الاتى من الجنوب شد حيله تمام و احنا اتجاهنا من الشمال للجنوب فمقابلين الموجه و هاتك يا رزع لدرجة ان الميه كانت بتغرق اللى قاعد على الطبلية ورا فدخلنا كلنا جوه المركب.

وصلنا المارينا و بلغناهم النتيجة و روحنا على الفندق

شوية و قلنا نروح نشرب قهوة و الا حد بيبلغنى مبروووك اخدتم رابع ؟؟؟

يا جماعة مش فاهمين يعنى رابع يوم و لا رابع ترتيب عام و لا ايه بالظيط؟

ما اخدناش نتيجة مفهومة فقلنا ننتظر النتيجة لما تتعلق .
و كانت المفاجأة اننا تالت ترتيب اليوم و قفزنا بالترتيب العام من السابع الى الرابع و بالتالى فى الحفل قفزنا الى الترتيب التالت لترتيب الدول فالاول ايطاليا ثم اسبانيا ثم مصر و هى الحمد لله نتيجة لم تحدث مسبقا فى اى بطولة عالم ان يدخل فريق مصرى فى فرق المقدمة الثلاثة الاولى

ثم كان حفل الختام و هو حفل اقل من المتواضع و هنا نشهد و نشيد بحفل ختام بطولة العالم فى 2010 حيث كان حفلا رائعا و مميزا عن حق .

و اجمل ما فى الموضوع هو الوقوف لسماع السلام الوطنى وسط احتفاء و احترام و تقدير من اللجنة المنظمة و الفرق الاخرى لفريق يأتى من ال12 الى الثالث و هو فى حد ذاته بالنسبة لنا بطولة اخرى فى حد ذاته.

الشىء الثانى اننا اثبتنا ان الصياد المصرى لم يفز ببطولة 2010 بمحض الصدفة او لأنه بيلعب على ارضه كما اشاعوا و انما لدينا من الخبرة و التخطيط ما سمح لنا بالوقوف كتفا بكتف مع الفرق القوية

اهم ما يميز فرق الصيد هى التفاهم و الحب بين اعضاء الفريق و هو من اهم اسباب الفوز فالكل يعمل للصالح العام و ليس لمصلحة او مجد شخصى

نحمد الله على العودة سالمين غانمين و الى بطولات اخرى ان شاء الله

و اعتذر ان كنت قد اطلت عليكم و اشكر من راسلنى و اتصل بى سواء بعد الرجوع او اثناء المسابقة .

و اترككم مع بعض الصور و اعتذر عن قلتها الى ان اتحصل على البقية

ملحوظة لا توجد صور للاسماك المصادة لأن كما اوضحت الموضوع كان كاتش اند ريليس و بالتالى هذا يستوجب سرعة التعامل مع السمك ثم ارجاعه للماء


اولا الكأس الغالية

Calvià-20120921-00009.jpg




الفريق المصرى


Calvià-20120921-00011.jpg





مركب اول يوم


DSCN3108.JPG




مركب تانى يوم


DSCN3140.JPG




مركب تالت يوم و يظهر الفارق بين الاولى و الثانية


DSCN3141.JPG




مراكب اخرى


DSCN3142.JPG





مراكب اثناء الانطلاق للذهاب الى اماكن الصيد


DSCN3112.JPG




منظر طبيعى لجزيرة مايوركا


DSCN3125.JPG




جزيرة صغيرة فى عرض البحر


DSCN3119.JPG




منظر اخر


DSCN3135.JPG




منظر لكاتدرائية بالما عاصمة مايوركا و اكبر ميناء سياحى فى الجزيرة


DSCN3133.JPG




DSCN3116.JPG




ليس لديك الصلاحية لمشاهدة المرفقات
مع تحياتى
سيف خيرى
عاشق الصيد


صورة


صورة العضو الشخصية
محمد نعيم
مشاركات: 731
اشترك في: الخميس نوفمبر 19, 2009 8:15 pm
مكان: الاسكندرية
اتصال:

Re: أحداث بطولة العالم للجر 2012 باسبانيا و فوز مصر

مشاركةبواسطة محمد نعيم » الأحد سبتمبر 30, 2012 12:40 pm

ما شاء الله ....... طريقة سرد رائعة
عجبني أوي سرعة التعامل مع الموقف في تغيير العدة
من فوز إلي فوز إن شاء الله و حمدلله علي السلامة
مبرووووووووووووووووووووووووووووووك

محمد نعيم
مهندس ميكانيكا

صورة العضو الشخصية
khaled
مشاركات: 241
اشترك في: الأربعاء مارس 26, 2008 8:49 am

Re: أحداث بطولة العالم للجر 2012 باسبانيا و فوز مصر

مشاركةبواسطة khaled » الأحد سبتمبر 30, 2012 1:11 pm

سيف بك ... الف الف مبروك ولكل مجتهد نصيب
المسلم للمسلم كالبنيان المرصوص يشد بعضة بعضاً

أحمد عودة
مشاركات: 475
اشترك في: الأربعاء أكتوبر 29, 2008 4:43 pm

Re: أحداث بطولة العالم للجر 2012 باسبانيا و فوز مصر

مشاركةبواسطة أحمد عودة » الأحد سبتمبر 30, 2012 1:11 pm

بسم الله والصلاة والسلام على رسول الله .. وبعد
اولاً حمداً للة على سلامتكم.
الف مليون مبروك يا ريسنا وان شاء الله المسابقة اللى جاية المركز الاول والثانى.

طول عمرها مصر ولادة.

أحمد عودة... صياد صغنن
والله أنى أحبكم فى الله أحبكم الذى أحببتكم من أجله

صورة العضو الشخصية
ابراهيم ابو السعد
مشاركات: 490
اشترك في: الأحد سبتمبر 09, 2007 9:15 pm
مكان: الجيزة
اتصال:

Re: أحداث بطولة العالم للجر 2012 باسبانيا و فوز مصر

مشاركةبواسطة ابراهيم ابو السعد » الأحد سبتمبر 30, 2012 1:15 pm

ولا وعملوها المصريين و بالامكانيا المصرية (فاكر قصص البطولة الدولية اللى كانت فى مصر كان المشرفين بيحكو على العدة اللى مع الايطالين قصص) المهم حمدا لله على السلامة وتعالى وانا اعزمك على جاتوه وحاجة ساقعة بدل ولاد الللللل الأسبان
صورة

صورة العضو الشخصية
midok33
مشاركات: 130
اشترك في: الثلاثاء سبتمبر 27, 2011 11:07 pm
مكان: الاسكندرية
اتصال:

Re: أحداث بطولة العالم للجر 2012 باسبانيا و فوز مصر

مشاركةبواسطة midok33 » الأحد سبتمبر 30, 2012 1:24 pm

حمدا لله على سلامتكم ومبروك لنا جميعا الانجاز المشرف جدا بترتيب عالمي متقدم

وأعجبني سردك تفاصيل الرحلة والمسابقة
تقرير جميل جدا نشكرك عليه يا أ. سيف وألف مبروك مجددا :)
. . . . . . . . . .صورة. . . . . . . . . .

Ahmed_youssef
مشاركات: 210
اشترك في: الجمعة سبتمبر 28, 2012 10:11 am
مكان: الاسماعيلية

Re: أحداث بطولة العالم للجر 2012 باسبانيا و فوز مصر

مشاركةبواسطة Ahmed_youssef » الأحد سبتمبر 30, 2012 1:38 pm

الــــــــــــــــــــــــــــــــــــــــــــــــــــــــف مبروك الفوز منه للي افضل منها ان شاء الله وفقكم الله

صورة العضو الشخصية
Mohamed Abu Samra
مشاركات: 496
اشترك في: الاثنين مارس 05, 2007 1:30 pm
مكان: الغردقة

Re: أحداث بطولة العالم للجر 2012 باسبانيا و فوز مصر

مشاركةبواسطة Mohamed Abu Samra » الأحد سبتمبر 30, 2012 1:40 pm

ما شاء الله ما شاء الله
يا حج طول و لا يهمك طول لغاية الصبح
انت عارف اخر خبر مفرح سمعناه عن بلدنا كان امتى؟
طب عارف كام واحد انبسط لما قرا الموضوع و عرف الخبر
انا عن نفسى ماكنش عاوزك تخلص
مبروك يا كبير
على فكرة انا اللى كنت و اخدلكم معظم صور الحفل الختامى فى 2010 بالجونة
بس صور المرة دى احلى بكتيير
محمد ابو سمرة
من كان رزقه على الله فلا يحزن

عبد السيد
مشاركات: 220
اشترك في: الأحد مايو 27, 2012 2:49 pm

Re: أحداث بطولة العالم للجر 2012 باسبانيا و فوز مصر

مشاركةبواسطة عبد السيد » الأحد سبتمبر 30, 2012 1:51 pm

مش لقى كلام اقوله غير الف الف مبروك وديما رفعين اسم مصر يا ابطال

الرايق
مشاركات: 120
اشترك في: السبت مايو 14, 2011 2:01 am

Re: أحداث بطولة العالم للجر 2012 باسبانيا و فوز مصر

مشاركةبواسطة الرايق » الأحد سبتمبر 30, 2012 1:59 pm

حمد الله على السلامة يا سيف بك ... سرد رائع و جميل جعلنا عايشين معاكم فى الرحلة لحظة بلحظة ... و فتح نفسنا على الصيد و البحر ... و الغريبة ان الواحد هنا بيحب يطلع على مركب كبيرة 18 _ 20 _ 25 متر ... و المراكب الصغيرة ال10 _ 12 متر احياناً كتير بتتعب الناس ... طيب عند الجماعة الاسبان كل المراكب 10 متر .. إية البخل دة ؟؟؟

بس رحلة جميلة و ان شاء الله تتكرر و ربنا ينصر مصر بولادها فى كل حتة ... اللهم آمين

Moustafa@eg
مشاركات: 156
اشترك في: الأحد سبتمبر 25, 2011 12:52 pm
مكان: Port-Said

Re: أحداث بطولة العالم للجر 2012 باسبانيا و فوز مصر

مشاركةبواسطة Moustafa@eg » الأحد سبتمبر 30, 2012 2:01 pm

ألف مبروك يا أستاذ سيف، و بالتوفيق دائما إن شاء الله

ابو عبده
مشاركات: 14
اشترك في: الأحد سبتمبر 09, 2012 12:18 pm

Re: أحداث بطولة العالم للجر 2012 باسبانيا و فوز مصر

مشاركةبواسطة ابو عبده » الأحد سبتمبر 30, 2012 2:09 pm

الف الف مبروك يا كبتن سيف

صورة العضو الشخصية
تامر أنور
مشاركات: 443
اشترك في: الخميس أغسطس 11, 2011 11:52 am
مكان: القاهـــــرة

Re: أحداث بطولة العالم للجر 2012 باسبانيا و فوز مصر

مشاركةبواسطة تامر أنور » الأحد سبتمبر 30, 2012 2:11 pm

الله يفرح قلبك يا استاذ سيف زى ما فرحتنا جميعآ بتشريفكم لينا ولمصر كلها
انا متأكد ان تعبكم اكبر بكتير من الوصف والسرد الرائع اللى حضرتك اسردته
لا بس الموضوع كبير يا جماعة برضو تالت ورابع عالم فى ميه غريبة مش معروفلها حال ...
بجد حضرتك وفريقك مصر أ وفريق مصر ب عباقرة صيد وثقافة مستوى رفيع.
معلش يا باشا ياترى محل الصيد الأسبانى ده ماتعرفش حضرتك تمن الطعم عنده عامل كام ؟ احنا هنستورده ونجيب من بره اصل المحلات هنا بئت اخر استغلال وهما اللى جابوه لنفسهم :mrgreen: :D :D :mrgreen:

الف حمد الله على سلامة حضرتك وسلامة الفريقين
ومليون مبروك .... شرفتونا يا ستاذ سيف احنا فخورين بكم :)

صورة العضو الشخصية
محمود حمزه
مشاركات: 242
اشترك في: الاثنين نوفمبر 15, 2010 9:02 pm

Re: أحداث بطولة العالم للجر 2012 باسبانيا و فوز مصر

مشاركةبواسطة محمود حمزه » الأحد سبتمبر 30, 2012 2:16 pm

بسم الله والصلاة والسلام على رسول الله .. وبعد حضرتك فعلا يا استاذ سيف عيشتنى فى مود الصيد و الجر و فعلا اثبت ان المصرى ما شاء الله عليه يستطيع ان يثبت الكفاءة فى اى مكان ... الف مبروك لمصر و عقبال كل مرة ان شاء الله :D
فريق وحوش ستالى ( حسام مسعود - محمود حمزة )
صورة

seif khairy
مشاركات: 5280
اشترك في: الثلاثاء مايو 02, 2006 3:17 pm
مكان: القاهرة-6 اكتوبر

Re: أحداث بطولة العالم للجر 2012 باسبانيا و فوز مصر

مشاركةبواسطة seif khairy » الأحد سبتمبر 30, 2012 3:21 pm

محمد نعيم كتب:

ما شاء الله ....... طريقة سرد رائعة
عجبني أوي سرعة التعامل مع الموقف في تغيير العدة
من فوز إلي فوز إن شاء الله و حمدلله علي السلامة
مبرووووووووووووووووووووووووووووووك



الله يبارك فيك يا باش مهندس محمد
و سرعة التعامل مع المواقف هو من اهم أسرار النجاح في اي شيء حتي لو كانت مسابقة صيد
اشكرك علي المرور
مع تحياتى
سيف خيرى
عاشق الصيد


صورة



العودة إلى “أخبار المسابقات و المهرجانات”

الموجودون الآن

المستخدمون الذين يتصفحون المنتدى الآن: لا يوجد أعضاء مسجلين متصلين وزائران